काठमाडौं, वैशाख २- नयाँ वर्षको दोस्रो दिन पनि प्रदीप भट्टराईको लेखन तथा निर्देशन रहेको ‘महाजात्रा’ दर्शक उत्साहजनक साथ पाएको छ । नयाँ वर्षको दोस्रो दिन फिल्म हेर्न उल्लेखनीय संख्यामा दर्शकहरू हलमा पुगेको पाइएको छ ।
नयाँ वर्षको दिन महाजात्राको टिकट नपाएर हल पुगेर फर्किएको गुनासो सामाजिक सञ्जालमा आइरहेको निर्देशक भट्टराईले बताएका छन् । उनी भन्छन्, ‘नयाँ वर्षमा महाजात्रालाई उपलब्ध सम्पूर्ण सो हाउसफुल भयो । फिल्मले तीन सातामा नेपालमा चौध करोड व्यापार गरेको थियो । हामीले हाम्रो अघिल्ला सम्पूर्ण रेकर्ड तोडिसकेका छौँ । विशेषतः हलमा आउनुभएको दर्शकलाई खुसी बनाएर फर्काउन पाएका छौँ, यो ठूलो सफलता हो ।’
यस्तै, फिल्मले तीन सातामा नेपालबाहिर नौ करोडको ग्रस कलेक्सन गरेको वितरण कम्पनी एमएसएम इन्टरटेन्मेन्टले जनाएको छ । उक्त कम्पनीका अनुसार शुक्रबार र शनिवार विदेशमा आयोजित सम्पूर्ण सो ‘शोल्ड आउट’ भएका छन् ।
तीन सातामा २३ करोड एक लाख ग्रस कलेक्सन गरेको फिल्मले नेपालमा १५ करोडको आँकडा पार गरिसकेको छ । ‘माउथ पब्लिसिटी’का कारण फिल्मले स्वदेश र विदेशमा नयाँ रेकर्ड बनाउने निर्माण पक्ष आशावादी छ ।
फिल्ममा हरिवंश आचार्य, वर्षा राउत, दिव्य देव, अर्जुनजंग शाही, प्रकाश घिमिरे, राजाराम पौडेल, प्रवीण खतिवडा, सुमन कार्की, शिशिर बाङ्देल, गौमाया गुरुङ, अरविन खड्का लगायतको अभिनय रहेको छ । म्याक्स दीपेश खत्री र यज्ञश्वर पौडेलले संयुक्त रूपमा निर्माण गरेका फिल्मका कार्यकारी निर्माता रवीन्द्रसिंह बानियाँ हुन् ।
