चाडपर्व मनाउन जानेको यात्रा सहज र सुरक्षित बनाउन सरकारको ध्यानाकर्षण

काठमाडौं, असोज ११- नेकपा एमालेले चाडपर्वको समयमा घर जाने नागरिकका लागि सहज यात्रा गर्ने वातावरण बनाउन सरकारको ध्यानाकर्षण गराएको छ ।

एमालेको विपद् व्यवस्थापन तथा स्वयंसेवा विभागले कार्यवाहक प्रधानमन्त्री प्रकाशमान सिंहलाई भेटेर सडकहरूको मर्मत गर्नुपर्ने, यातायातका साधनको अभाव हुन नदिन, यात्रुहरूको सुरक्षाको व्यवस्था लगायतका विषयमा ध्यानाकर्षण पत्र बुझाएको हो ।

विभागका प्रमुख खिमलाल भट्टराईले यात्रुहरूको ठूलो पंक्तिका लागि सहज रूपमा सवारी साधनको व्यवस्था गर्न, राजमार्गहरूको मर्मत सम्भार गर्न ध्यानाकर्षण गराइएको बताए । उनले सम्भावित दुर्घटना र जोखिमबाट बच्न सडक एम्बुलेन्स र आवश्यक सुरक्षाकर्मीहरूको प्रबन्ध गर्न ध्यानाकर्षण गराए ।

राजमार्ग छेउका होटलहरुमा गुणस्तरीय खाजा खानाका साथै ठगि हुन नदिन सरोकारवाला निकायको प्रभावकारी परिचालन गर्न पनि उनले आग्रह गरे ।

ध्यानाकर्षण पत्र बुझ्दै कार्यवाहक प्रधानमन्त्री सिंहले चाडपर्वलाई सुरक्षित तवरले मनाउने वातावरण बनाउन सरकारी निकायबीच समन्वयकारी ढंगले काम भइरहेको जानकारी दिए  । ध्यानाकर्षणमा रहेका बुँदाहरूलाई कार्यान्वयनका लागि आफूले सक्दो पहल गर्ने उनको भनाइ छ ।

त्यस्तै एमालेले चाडपर्वमा हुनसक्ने महंगी र कालोबजारी रोक्न प्रभावकारी अनुगमन गर्नुपर्ने, सुपथ मूल्यका पसलहरू देश भरी खोल्नुपर्ने लगायतका सुझाव दिएको छ ।