राप्तीका नगर प्रमुख शमशेर लामा सवार गाडी माथी ढुङ्गा प्रहार

चितवन ,असार २३- चितवनको राप्ती नगरपालिकाका नगर प्रमुख शमशेर लामा सवार गाडीमा ढुङ्गा प्रहार भएको छ ।

आज बेलुका करिब ९ः१५ बजेको समयमा नगर प्रमुख लामा सवार राप्ती नगरपालिकाको बा २ झ ३६६६ नम्बरको गाडीमा ढुङ्गा प्रहार भएको हो ।

राप्ती नगरपालिका वडा नम्बर २ गड्यौली नजिक भित्री सडक खण्डमा आफू सवार गाडीमाथीे ढुङ्गा प्रहार भएको नगर प्रमुख लामाले बताए ।

नगर प्रमुख लामा आफैले गाडी चलाएको अवस्थामा गाडीमा ढुङ्गा प्रहार भएको हो । आफैमाथी लक्षित गरेर ढुङ्गा प्रहार भएको तर संयोगले चालकको भन्दा पछाडीको सिसामा ढुङ्गा लागेको उनले बताए ।

ढुङ्गा प्रहारबाट गाडीको सिसा फुटेको छ भने नगर प्रमुख लामा सुरक्षित रहेका छन् । नगर प्रमुख सवार गाडीमाथी आक्रमण भएको र सो विषयमा अनुसन्धान भइरहेको प्रहरीले जनाएको छ ।