रोनाल्डोको पोर्चुगल र एमबाप्पेको फ्रान्सबिच सेमिफाइनलमा पुग्न घम्साघम्सी

काठमाडौँ, असार२१- युरोकप फुटबल प्रतियोगिताको १७औँ संस्करणमा उपाधिको बलियो दाबेदार मानिएका दुई टोली पोर्चुगल र फ्रान्सबिच शनिवार दोस्रो क्वार्टरफाइनल खेल खेलिँदैछ । उक्त खेल नेपाली समय अनुसार, बिहान ००ः४५ बजे सुरु हुनेछ ।

जारी युरोकपमा पोर्चुगल र फ्रान्स दुबैको प्रदर्शन उत्कृष्ट देखिएको छ । यी दुबै टोलीको उपाधिको हकदारका रूपमा पनि हेरिएको छ । यद्यपि, शनिवार बिहानको खेलपछि यी दुईमध्ये एक टोली सेमिफाइनलमा पुग्न र अर्को टोली घर फर्किने पक्का छ ।

पोर्चुगल समूहगत चरणमा विजेता बन्दै नकआउट चरणमा प्रवेश गरेको थियो । प्रारम्भिक चरणमा पोर्चुगल समूह ‘एफ’ मा परेको थियो । पोर्चुगलले तीनमध्ये दुई खेलमा जित र एक खेलमा हारको नतिजा निकालेको थियो ।

समकालीन विश्व फुटबलका महान् खेलाडीमध्येका एक क्रिस्टियानो रोनाल्डोको कप्तानीमा रहेको पोर्चुगलले आफ्नो पहिलो खेलमा चेक गणतन्त्रलाई २–१ गोलले हराएको थियो । पोर्चुगलले आफ्नो दोस्रो खेलमा टर्कीमाथि ३–० गोलको सजिलो जित हात पारेको थियो ।

तेस्रो खेलमा भने पोर्चुगलको टोली अप्रत्याशित रूपमा तुलनात्मक रूपमा कमजोर प्रतिद्वन्द्वी जर्जियासँग ०–२ गोलले पराजित हुन पुगेको थियो । समूहगत चरणमा पोर्चुगलले कुल पाँच गोल गरेको थियो भने तीन गोल खाएको थियो ।

प्रि–क्वार्टरफाइनलमा भने पोर्चुगलले स्लोभानियालाई पेनाल्टी सुटआउटमा ३–० गोलले हराएको थियो । यी दुबै टोलीबिचको निर्धारित र थप गरिएको समयको खेल गोलरहित बराबरीमा सकिएको थियो । उक्त खेलमा पोर्चुगलका गोलरक्षक डिएगो कोस्टा नायक बनेका थिए ।

यसैगरी फ्रान्स समूहगत चरणको उप–विजेता बन्दै नकआउट चरणमा प्रवेश गरेको थियो । प्रारम्भिक चरणमा फ्रान्स समूह ‘डी’ मा थियो । फ्रान्सले तीनमध्ये एक खेलमा जित र दुई खेलमा बराबरीको नतिजा निकालेको थियो ।

फ्रान्सले आफ्नो पहिलो खेलमा अस्ट्रियालाई १–० गोलले हराएको थियो । दोस्रो खेलमा फ्रान्सको टोली नेदरल्यान्ड्ससँग गोलरहित बराबरीमा रोकिएको थियो । तेस्रो खेलमा पनि फ्रान्सको टोली पोल्यान्डसँग १–१ गोलको बराबरीमा रोकिएको थियो ।

फ्रान्सले समूहगत चरणको खेलमा केवल दुई गोल गरेको थियो भने एक गोल खाएको थियो । अन्तिम १६ टोलीबिचको भिडन्तमा भने फ्रान्सले बलियो प्रतिद्वन्द्वी बेल्जियममाथि १–० गोलको प्रतिस्पर्धात्मक जित हात पारेको थियो ।

विश्व फुटबल महासंघद्वारा जारी गरिएको पछिल्लो वरीयतामा फ्रान्स दोस्रो र पोर्चुगल छैटौँ स्थानमा आसीन छन् । युरोकपको छनोट प्रतियोगितामा पनि यी दुबै टोलीले उत्कृष्ट प्रदर्शन गरेका थिए । पोर्चुगल आफ्नो समूहको विजेता बन्दै युरो कपमा छनोट भएको हो ।

पोर्चुगलले छनोट चरणमा खेलिएको १० वटै खेलमा जित हात पारेको थियो । छनोट चरणमा पोर्चुगलले विपक्षीको पोष्टमा कुल ३६ गोल गरेको थियो भने केवल दुई गोल खाएको थियो । छनोट प्रतियोगितामा पोर्चुगलका कप्तान क्रिस्टियानो रोनाल्डो एक्लैले १० गोल गरेका थिए ।

जारी युरोकपको छनोट प्रतियोगितामा फ्रान्स पनि आफ्नो समूहको विजेता बनेको थियो । फ्रान्स पनि आफ्नो समूहमा अपराजित रहँदै युरोकपमा छनोट भएको हो । छनोट चरणमा खेलिएको आठमध्ये सात खेलमा विजयी भएको फ्रान्स एउटा खेलमा भने बराबरीमा रोकिएको थियो । छनोट प्रतियोगितामा फ्रान्सले विपक्षीको पोष्टमा २९ गोल गरेको थियो भने केवल तीन गोल खाएको थियो ।