चितवन, वैशाख २- नयाँ वर्ष २०८१ को अवसरमा क्यान्सरपीडित बालबालिकालाई रोयल राइनो राइडर्सले स्वास्थ्य लाभको कामनासहित उपहार दिएको छ ।
चितवनको मोटरसाइकल क्लब राइडर्सले विपी कोइराला मेमोरियल क्यान्सर अस्पतालको बाल क्यान्सर रोग विभागमा क्यान्सरपीडित बालबालिकालाई विभिन्न स्टेसनरी, खेलकुद तथा मनोरञजनात्मक सामग्री बितरण गरेको हो ।
कार्यक्रमको संयोजक रोयल राइनो राइडर्स क्लबका सदस्य डा. शशांककुमार सिंहले क्लबको मूल उदेश्य सामाजमा विभिन्न संवेदनशील विषयमा जनचेतना फैलाउनु रहेको बताए । उनले समाजमा आवश्यक ठाउँमा पुगेर सक्दो सहयोग गर्न पनि आफूहरु सक्रिय रहेको बताए । उनले आफूहरुले बिगतमा पनि विभिन्न कार्यक्रमहरु गरिरहेको जस्तै हरेक वर्ष पुरुषको मानसिक स्वास्थ्य र प्रोस्टेट क्यान्सरको बारेमा जनचेतना फैलाउने कार्यक्रम, सडक सुरक्षाको सचेतना र विभिन्न च्यारिटी राइडहरु गर्ने गरेको जानकारी दिए । उनले भने, ‘यो नयाँ वर्ष २०८१ को अवसरमा ब्लिसफुल बन्डल कार्यक्रम गरी क्यान्सर अस्पतालको बाल क्यान्सर रोग विभागमा क्यान्सरपीडित बालबालिकाको मानसिक र शारीरिक विकासमा टेवा पु¥याउने लक्ष्यले स्टेसनरी, खेलकुद तथा मनोरञजनात्मक सामग्री बितरण गर्दै उनीहरूको कठिन पल हरुमा केही खुसी भर्ने सानो प्रयास गरेका छौँ ।’
कार्यक्रममा रोयल राइनो राइडर्सका अध्यक्ष प्रितम श्रेष्ठले स्टेसनरी, खेलकुद तथा मनोरञ्जनात्मक सामग्रीहरु अस्पतालका बाल क्यान्सर रोग विभागीय प्रमुख तथा बाल क्यान्सर रोग विषेशज्ञ डा. कृष्ण सागर शर्मालाई हस्तान्तरण गरे । उनले यस्ता कार्यक्रमलाई क्लबले भविष्यमा पनि निरन्तरता दिने र बाल क्यान्सर रोगपीडित बालबालिकालाई सहयोग गर्ने थप अन्य कार्यक्रमहरु पनि आयोजना गर्ने बताए । शिवशक्ति बालमैत्री शैक्षिक सामग्री बिक्री केन्द्र र दिलमाया पुस्तक पसलले शैक्षिक सामग्री जुटाउन सहयोग र सहज गरिदिएकोमा धन्यवाद दिए । उक्त कार्यक्रममा क्लबका उपाध्यक्ष मन्दिपमान श्रेष्ठ, कोषाध्यक्ष शुभम् लामालगायत क्लबका अधिकांश सदयहरु डा. प्रतिमा घिमिरे सिंह र बाल क्यान्सर रोग विभागमा कार्यरत नर्सहरूको पनि उपस्थिति रहेको थियो । सो कार्यक्रममा डा. शर्माले बाल क्यान्सरको प्रारम्भिक लक्षण, किसिम र उपचार पद्धति र सोसँग सम्बन्धित समस्याको बारेमा क्लबका सदस्यहरूलाई जानकारी गराए ।
