रत्ननगर नगरपालिकाले तोक्यो डेंगु परीक्षण शुल्क

रत्ननगर, साउन २८- रत्ननगर नगरपालिकाले डेंगु रोग निदानका लागि सबै निजी स्वास्थ्य संस्थामा परीक्षण शुल्क तोकेको छ ।

रत्ननगर नगरपालिकाका निमित्त प्रमुख प्रशासकीय अधिकृत बद्रिनारायण शर्माले एक सूचना जारी गरी निजी स्वास्थ्य संस्थाहरुमा डेंगु रोग परीक्षण शुल्कमा एकरुपता नभएको जनगुनासो आएको भन्दै डेंगु एनएसआई एन्टिजिन परीक्षण शुल्क ६०० रुपैयाँ तोकिएको र सोही बमोजिम शुल्क कायम गर्न आग्रह गरेका छन् ।

हाल डेंगु रोग देशव्यापीरुपमा फैलिएको र रत्ननगर नगरपालिकामा समेत उच्च जोखिम रहेकोले परीक्षण शुल्कमा एकरुपता कायम गरिएको नि. प्रमुख प्रशासकीय अधिकृत शर्माले बताए ।