बैंकिङ कसुर मुद्दामा कलाकार शिशिर पक्राउ

0
136
काठमाडौं, असार २१– बैंकिङ कसुर मुद्दामा प्रहरीको केन्द्रीय अनुसन्धान ब्यूरो(सीआईबी)को टोलीले कलाकार, निर्माता तथा निर्देशक शिशिर शमशेर राणालाई पक्राउ गरेको छ । टोलीले राणालाई काठमाडौंको बिजुलीबजारबाट पक्राउ गरेको हो ।राणालाई उच्च अदालत पाटनले २०७७ माघ २६ मा बैंकिङ कसुर मुद्दामा ४५ लाख जरिवाना र १० दिनको कैद सजाय सुनाएको थियो । सीआईबीका अनुसार राणाले ललितपुरकै एक व्यक्तिबाट घर व्यवहार चलाउने भन्दै ४५ लाख ऋण लिएका थिए ।

ऋण तिर्ने बेलामा रकम पर्याप्त नभएको नबिल बैंकको चेक दिएपछि राणामाथि बैंकिङ कसुरको उजुरी परेको थियो ।

प्रोडक्सन म्यानेजरका रुपमा फिल्ममा आएका राणाले ‘अन्दाज’, ‘वडा नम्बर छ’, ‘क्लासिक’, ‘रामकहानी’, ‘पोई पर्‍यो काले’ लगायत फिल्ममा अभिनय गरेका छन् । उनी फिल्म ‘तिमी सँग’ र ‘पोई पर्‍यो काले’का निर्देशकसमेत हुन् । उनले फिल्म ‘माला’मा लगानी नै गरेका छन् ।