भरतपुर महानगरपालिका द्वारा चार अर्ब ८१ करोड १२ लाख ६५ हजार रुपैयाँ बराबरको बजेट सार्वजनिक

0
213

चितवन, असार १०-

भरतपुर महानगरपालिकाले आर्थिक वर्ष २०७८\७९ का लागि अनुमानित आय व्ययसहितको कुल चार अर्ब ८१ करोड १२ लाख ६५ हजार रुपैयाँ बराबरको बजेट सार्वजनिक गरेको छ ।

नवौँ नगर सभामा आज महानगर प्रमुख रेनु दाहालले नीति तथा कार्यक्रम तथा बजेट प्रस्तुत गरिेन् । उक्त बजेट सर्वसम्मतरुपमा पारित भएको महानगर प्रमुख रेनु दाहालले बताइन् । व्यवस्थापन आन्तरिक आयबाट एक अर्ब २० करोड (घरजग्गा रजिष्ट्रेशन एवम् खानी तथा खनिज जन्य पदार्थको बाँडफाँडबाट प्राप्त आय समेत),अन्तर सरकारी वित्तीय हस्तान्तरणबाट एक अर्ब ७७ करोड २९ लाख ८३ हजार, केन्द्र तथा प्रदेश सरकारको राजश्व बाँडफाँडबाट प्राप्त ४४ करोड ८२ लाख ८२ हजार, जनसहभागिताबाट ३० करोड, बैँक मौज्दातबाट एक अर्ब, मर्मत सम्भार कोषबाट तीन करोड, सडक बोर्डबाट तीन करोड र जिल्ला समन्वय समिति चितवनबाट तीन करोड रहने महानगरपालिकाले प्रक्षेपण गरेको छ ।

अन्तर सरकारी अख्तियारीबाट अनुमानित एक अर्ब २० करोड मूल सञ्चितकोषमा प्राप्त नहुने भएकोले अन्तर सरकारी अख्तियारी शीर्षकबाटै खर्च तथा लेखांकनको व्यवस्था गरिने समेत महानगरले जनाएको छ ।

भरतपुर महानगरपालिकाले निर्माणाधीन गौतमबुद्ध अन्तर्राष्ट्रिय क्रिकेट रंगशालाका लागि दुई करोड बजेट छुट्याएको छ । यसका साथै चालु आर्थिक वर्षमा निर्माण सम्पन्न हुन नसकेका तथा भुक्तानी बाँकी रहेका र अधुरो योजनाहरु समयमै सम्पन्न गर्नका लागि भन्दै महानगरले एकमुष्ट ९८ करोड रुपैयाँ बजेट विनियोजन गरेको जनाएको छ ।

यस्तै,महानगरपालिका भित्रका सबै वडाहरूको समानुपातिक विकासका लागि प्रति वडा एक करोड ७० लाखका दरले ४९ करोड ३० लाख, भौतिक पूर्वाधार तथा सहरी विकासका लागि ४१ करोड, शिक्षा क्षेत्रको विकास एवम् सुधारका लागि १२ करोड ५० लाख, स्वास्थ्य सेवा क्षेत्रमा नौं करोडका साथै महानगर कोभिड–१९ नियन्त्रण तथा प्रभावकारी उपचारका लागि एक करोड ९० लाखको कोष बजेट समेत छुट्याइएको महानगरले जनाएको छ ।

महानगरको विशेष प्राथमिकताको क्षेत्र कृषि तथा पशुपन्छी क्षेत्रको विकास एवम् बिस्तारका लागि भन्दै कृषि अनुदानमा ५० प्रतिशत अनुदानमा कृषि यन्त्र उपकरण,कृषि सिँचाइमा अनुदान,कृषकहरूको क्षमता अभिवृद्धि गर्ने तथा प्रविधि हस्तान्तरण, कृषि बिमालगायतका कार्यक्रमहरुको निरन्तरताका लागि महानगरले कुल आठ करोड ७० लाख बजेट विनियोजन गरेको छ ।

विशेषगरी महानगरले यस पटक कृषि र कृषकको महत्वलाई पहिलो प्राथमिकता दिँदै दूधमा हालसम्म एक रुपैयाँका दरले अनुदान उपलब्ध गराउँदै आएको महानगरपालिकाले बजेट मार्फत थप दुई रुपैयाँ बृद्धि गर्दै अनुदानलाई तीन रुपैयाँ पु¥याइएको जनाएको छ ।

महानगरपालिका भित्रका सबै वडाहरूको समानुपातिक विकासका लागि प्रति वडा एक करोड ७० लाखका दरले ४९ करोड ३० लाख बजेट छुट्टाइएको भरतपुर महानगर प्रमुख रेनु दाहालले बताइन् । भौतिक पूर्वाधार तथा सहरी विकासका लागि ४१ करोड, शिक्षा क्षेत्रको विकास एवम् सुधारका लागि १२ करोड ५० लाख, स्वास्थ्य सेवा क्षेत्रमा ९ करोडका साथै महानगर कोभिड–१९ नियन्त्रण तथा प्रभावकारी उपचारका लागि एक करोड ९० लाखको कोष बजेट समेत छुट्याइएको महानगर प्रमुख दाहालले बताइन् ।

आधारभूत एवम् गुणस्तरीय स्वास्थ्य सेवामा महानगरबासीको पहुँच सुनिश्चित गर्न स्वास्थ्यको सर्वव्यापी पहुँचको अवधारणा अनुसार वडामा स्वास्थ्य संस्था स्थापना, कोरोना संक्रमणको सम्भावना भएका व्यक्तिहरुको परीक्षण तथा उपचार, स्वास्थ्य संस्थामा सुत्केरी हुने महिलालाई निःशुल्क यातायात एम्बुलेन्स खर्च, क्याल्सियम सप्लिमेन्टेसन कार्यक्रम र झुल वितरण कार्यक्रम तथा खोप क्लिनिक, गाउँघर क्लिनिकलगायत सामुदायिक सेवालाई निरन्तरतालगायतका कार्यक्रम कार्यान्वयन गर्न एकमुष्ठ नौ करोड रुपैयाँ विनियोजन गरिएको छ । साथै कोभिडको नियन्त्रण तथा प्रभावकारी उपचारको लागि एक करोड ९० लाखको महानगरपालिका कोभिड कोषस्थापना गरिने छ ।

५० प्रतिशत अनुदानमा कृषि यन्त्र उपकरण उपलब्ध गराउने, कृषकलाई साना सिँचाइमा अनुदान, कृषकहरूको क्षमता अभिवृद्धि गर्ने तथा प्रविधि हस्तान्तरण गर्ने, कृषि बिमा कार्यक्रमलाई निरन्तरता दिइनेलगायतका कृषि विकासतर्फका कार्यक्रम सञ्चालन गर्न एकमुष्ठ ८ करोड बजेट विनियोजन गरिएको छ।

साथै पशुसेवाका कार्यक्रममा अनुदान प्रदान गर्ने, बीउबिजन र मल वितरणमा अनुदान दिने, दूधमा अनुदान कार्यक्रम,कमजोर भएका र रोजगारी नभएका विपन्न परिवारहरूको जीविकोपार्जनका लागि निर्वाहमुखी पशुपन्छी पालन कार्यक्रम, पशुजन्य पदार्थहरूको उत्पादन र उत्पादकत्व अभिवृद्धि गर्न नश्ल सुधार तथा कृत्रिम गर्भाधान कार्यक्रम, मत्स्य व्यवसाय प्रवद्र्धन कार्यक्रमलगायतका पशु विकास कार्यक्रम कार्यान्वयनमा ल्याउनको लागि आठ करोड ७० लाख बजेट व्यवस्था गरिएको छ ।

फोहोरको प्रभावकारी संकलन, ढुवानी तथा व्यवस्थापन एवम् हरियाली प्रवद्र्धन गर्ने, एक घर दुई फलफूल विरुवा कार्यक्रम सञ्चालन, महानगरलाई प्लास्टिक मुक्त घोषणा कार्यक्रम, फोहोरलाई स्रोतमा वर्गीकरण गरी नकुहिने फोहोरमात्र संकलन गर्नेलगायतका कार्यक्रम कार्यान्वयन गर्न एकमुष्ठ सात करोड विनियोजन गरिएको छ ।

विद्यालयको भौतिक सुदृढिकरण कार्यक्रम, जस्तापाताको छानो भएका कक्षाकोठामा फल सिलिङ तथा विद्यालय कलर कोड, विद्यालयको रङरोगन गर्ने, एक वडा एक नमुना विद्यालय कार्यक्रमलाइ निरन्तरता दिने, अन्तर्राष्ट्रिय, राष्ट्रिय, प्रदेशस्तरीय खेलमा पदक जित्ने महानगरका खेलाडीहरुलाई पुरस्कृत तथा सम्मान गर्ने, शिक्षालाइ प्रविधिसँग आवद्ध गर्नेलगायतका शैक्षिक विकासको नीति कार्यान्वयन गर्नको लागि १२ करोड ५० लाख बजेट विनियोजन गरिएको छ ।

विपद् सामग्री खरिद, उचित भण्डारण, जनशक्ति परिचालन, जोखिम अल्पीकरणका कार्यक्रम सञ्चालनसाथै कोरोना महामारी नियन्त्रणका लागि महानगरका विभिन्न स्थानमा क्वारेन्टिन स्थलहरुको प्रभावकारी व्यवस्थापन लगायतका कार्यक्रम सञ्चालन गर्न एकमुष्ठ ५० लाख रुपैयाँ साथै विपद तथा प्रकोप व्यवस्थापन कोषमा एकमुष्ठ एक करोड ५० लाख विनियोजन गरिएको छ ।

सहकारी संस्थाहरूलाई समुदायस्तरमा प्रवद्र्धन गरी युवा स्वरोजगार कार्यक्रम सञ्चालन, युवाहरूलाई सहकारी संस्था वा बैंकमार्फत लिने तीन लाख र पाँच लाख रुपैयाँ सम्मको ऋणमा तीन वर्षसम्मको लागि क्रमशः शतप्रतिशत र असी प्रतिशत ब्याज अनुदान कार्यक्रम सञ्चालन, विदेशबाट आर्जन गरेको सीप उपयोग गरी रोजगारी पैदा गर्ने खालका कृषिलगायतका साना उद्यम गर्न चाहने युवाहरुलाई अनुदानलगायतका कार्यक्रम कार्यान्वयन गर्नको लागि एकमुष्ठ तीन करोड ५० लाख विनियोजन गरिएको छ ।

निजी क्षेत्रलयागत अन्य विकास सहयात्रीसँग सहकार्य निजी तथा अन्य क्षेत्रको सहकार्यमार्फत पुर्वाधार विकास र सेवा प्रवाह गर्नको लागि एकमुष्ठ तीन करोड ५० लाख बजेट विनियोजन गरिएको छ । युवाका कार्यक्रम तथा युवाको नेतृत्व विकासमा जोडदिने लगायतका कार्यक्रमको लागि एकमुष्ठ तीन करोड विनियोजन गरिएको छ।

महानगरको सूचना तथा अभिलेख केन्द्र स्थापनामा व्यवस्थित गर्ने, सफ्टवेयर मर्मत तथा सम्भारलगायतको कार्यक्रम कार्यान्वयन गर्न दुई करोड ५१ लाख ५८ हजार विनियोजन गरिएको छ । प्राचिन नाच, कला तथा संस्कृतिको संरक्षण, पर्यटकीय पदमार्ग निर्माणको लागि सम्भाव्यता अध्ययन तथा घरेलु साना उद्योग सञ्चालनसम्बन्धी विशेष कार्यक्रम सञ्चालनलगायतका कार्यक्रम कार्यान्वयन गर्नको लागि एकमुष्ठ दुई करोड ५० लाख विनियोजन गरिएको छ।

अद्यावधिक सेवाग्राहीले कर तिरिसकेपछि एसएमएस मार्फत् धन्यवाद ज्ञापन गर्ने कार्यक्रम, डिजिटल प्रणालीमा आबद्ध गरी प्रत्येक करदातालाई एकीकृत कर पोर्टलअन्तर्गत व्यक्तिगत कर पहिचान नम्बर प्रदानलगायतका कार्यक्रम कार्यान्वयन गर्नको लागि एक करोड ५० लाख बजेट विनियोजन गरिएको छ ।

कर्मचारीको क्षमता अभिबृद्धि गर्न, नेपाल सरकारले बढाएको तलबमानको अतिरिक्त महानगरपालिका र अन्तर्गत कार्यरत राजपत्राङ्कित कर्मचारीहरूलाई तलबमानको १० प्रतिशत र राजपत्र अनंकित कर्मचारीहरूलाई तलबमानको १५ प्रतिशत प्रोत्साहन भत्ताको लागि बजेट विनियोजन गरिएको छ । नेपाल सरकारले व्यवस्था गरेको पर्यटन काज समेतको लागि बजेट व्यवस्था गरिएको हो ।

विगत आर्थिक वर्षदेखि दिइँदै आएको मासिक खाजा खर्च कटौती गरिएको छ । महानगरपालिका तथा वडा कार्यालयको समग्र प्रशासनिक खर्च को लागि एकमुष्ठ ५९ करोड विनियोजन गरिएको छ । लक्षित वर्ग कार्यक्रम तथा सामाजिक उत्थान क्षेत्रकोसमग्र नीति कार्यान्वयन गर्नको लागि एकमुष्ठ एक करोड ४० लाख बजेट विनियोजन गरिएको छ।